(عاشقونم)

سئوگيليم منده سنين دل نگران عاشقونم

صاحب درد وغم وآه وفغان عاشقونم

باخما بوآغ باشيما گوزدن آخان قان ياشيما

غصه دن گرچه قوجالسامدا جوان عاشقونم

چوخ سئون عاشق آليب كام گوزل ياريندن

من بيچاره هله درد كشان عاشقونم

آشكارا سنه باخماقه يوخومدير جرأت

خلوت جاندا دل شبده نهان عاشقونم

منی بو تئزليگه قاتما هله اهل هوسه

كی سنين دهريده من جمله زامان عاشقونم

سنی تانری منی درك ايله نگارا اؤلورم

كی دالينجا گوزليم من او دوان عاشقونم

يوزينين عكسينی گوستر منه می جامينده

منده آخر سنين ای پيرمغان عاشقونم

قامتيم خم اولوب ای سرو روان رحم ائيله

يازيق عبدالصمدم قددی كمان عاشقونم

(اولماقدادير)

حلقه گيسوسينه كونلوم اسير اولماقدادير

يعنی عالمده ايشيم آه و نفير اولماقدادير

من نئجه بو غصه ودرد وغمه تاب ائيله ييم

بيشه عشقينده يارين خصم شير اولماقدادير

نيله ييم يوخدير تابی هجرانه بيرآن قلبيمين؟

ای دريغا دلبرين ديداری دير اولماقدادير

ای او كسلر كی چاتيبسيز دولت وصله گلون

درد هجراندان بو زار كونلوم فقيراولماقدادير

ياده سالمير يار منی چوخ ائيله ييرآزارمنی

گوئيا مندن او بی انصاف سيراولماقدادير

عقليمی يولدان چيخارديب عشق بيلمم نيليرم

زندگانی راهی منچون بی مسير اولماقدادير

باشيما دن دوشدی ساچلاريم آغاردی حيف اولا

غصه دن عبدالصمد دردا كی پيراولماقدادير

(سنی ا‍‍يستیرم)

گوزليم بو دونيادا تكجه من سنی ايستيرم سنی ايستيرم

ندی ياس و سوسن و نسترن سنی ايستيرم سنی ايستيرم

نه شكرنده دوزی ايستيرم نه شيويد نه يارپوزی ايستيرم

نه آيی نه اولدوزی ايستيرم سنی ايستيرم سنی ايستيرم

تبی ايستمم تابی ايستمم مه و مهر و مهتابی ايستمم

می ايله دولان قابی ايستمم سنی ايستيرم سنی ايستيرم

منه امر ائله جانيمی وئريم دل مست و ويرانيمی وئريم

دينيميله ايمانيمی وئريم سنی ايستيرم سنی ايستيرم

اوقدآغلاييب يورولوب گوزوم اوقدريانيب كول اولوب كوزوم

داها رحم ائله قوتاريب دؤزوم سنی ايستيرم سنی ايستيرم

منه اولما ای گوزليم غنيم يورولوب داها بو جانيم تنيم

جاوابين وئر احساسيمين منيم سنی ايستيرم سنی ايستيرم

دئميرم آياغيما گل منيم اؤلورم سؤراغيما گل منيم

بو سؤيوق اوجاغيما گل منيم سنی ايستيرم سنی ايستيرم

صمدم من عاشق فريادام گوزوون خيالينا معتادام

منه شيرين اول سنه فرهادام سنی ايستيرم سنی ايستيرم

(من اولام)

نه اولار ای گوزليم همدمين آيا من اولام؟

نه روا بئش گون اولان دونيادا تنها من اولام!

نه اولارمنده آغاج تك اوريينده كؤك آتام؟

گونده بير وعده سنه دادلی معما من اولام

گئجه لر ناز يوخولاريندا منی گزديره سن

گوزلرينده ياشيان گزملی رويا من اولام

يان ائدم زولفون اوزوندن گونشه زائراولام

تيره آخشاملارادا مژده فردا من اولام

دارايام تئللرينی مات ائليم ائللرينی

باغبان چمن زلف چليپا من اولام

منكی ايللر بويی اؤز آديما مجنون دئميشم

يئری وار واصل كاشانه ليلا من اولام

زرپرست اولمارام عبدالصمدم اهل دلم

عشقيله ايسته ييرم بير يئكه دونيا من اولام

(سنسيز)

گوزل دلبر قالا بيلمم بو دونياده اينان سنسيز

اليمدن بير دوتان يوخدير قارانليقدير جهان سنسيز

مكان تاريك و ظلمتدير زمان بند اسارتدير

سراسر آه و حسرتدير زمان سنسيز مكان سنسيز

ائديب عشقين منی نالان قوتارمير بو غم هجران

وصاله چاتماسام هرآن من اوللام باغری قان سنسيز

بو زار جسميمده قال جان تك وجوديمله قاريش قان تك

منه اول نازلی جيران تك قالا بيلمير بو جان سنسيز

آليشديم عشق اوجاقوندان كوله دوندوم فراقوندان

اؤپوم گل قان يانا قوندان رازيم اولماز عيان سنسيز

قدحلرده شراب قالماز اوركده التهاب قالماز

يئراوزره ذره تاب قالماز چاتار عرشه فغان سنسيز

جهاندا اعتبار اولماز زماندا اختيار اولماز

يئرينده برقرار اولماز زمين و آسمان سنسيز

گئدر حال و صفادن ياز دوشر شور و نوادن ساز

غزل عبدالصمد يازماز اؤلر ذوق و بیان سنسيز

(جفا)

نه اولدی ای گوزليم سن منی رها ائتدين؟

منيم كيمی جاوانی سن نه تئز قوجا ائتدين

دئنن گوروم كی سنه من نه پيس ليگ ائتميشديم؟

گئديب رقيبيميله دائما صفا ائتدين

زمانه جؤرينه من هئچ زمان ييخيلمازديم

ولی نه چاره منه سن اؤزون جفا ائتدين

سنين وصالينا من چوخ تلاش و جهد ائتديم

فراق اودوندا منی يانديريب خطا ائتدين

منيم گونوم كئچه جك ياخچی يا يامان اما

فقط بو مطلبی بيل كار ناروا ائتدين

باخاندا لبلرينه قان اولوردی زار اورگيم

او لبلريله ندن غيری آشنا ائتدين؟

قوتاردی عمر هله دوشمورم سنين يادينا

منی خوش آرزولاريمدان ندن جدا ائتدين؟

بلالی باشيمی عبدالصمد هارا آپاريم؟

كی شعروويله منی غرقه بلا ائتدين

(عشق بيلمزسن ندير)

تا سنه گوز وورماييب يارعشق بيلمزسن ندير

قصّه دیر تا وصل دلدار عشق بيلمزسن ندير

درد و غمله خاطره يله خلوت ائتمك قصه دير

خلوتينده اولماسا يار عشق بيلمزسن ندير

قويماييب بالينووه تا باشينی اول گولعذار

حالدا بيلمزسن نلر وار عشق بيلمزسن ندير

دلبرين زولف خمی زنجير شير نر كيمی

بوينونا تا اولماييب دار عشق بيلمزسن ندير

يارسيز ايچمگ باده نی البته عين زهريدی

اولماسا بير چشم خمّار عشق بيلمزسن ندير

عاقل اول عبدالصمد گئد بير دريندن فكر ائله

غم ائديب تا عقلی بيمارعشق بيلمزسن ندير

شعری بوشلا گئد عملده وصل ياره جهد ائله

با کلام و حرف و گفتار عشق بيلمزسن ندير

(خلوتده دئييم)

گل گيلن درديمی ای يار سنه خلوتده دئييم

گوندوز اولمازسا مناسب شب ظلمتده دئييم

نه گوروب منده قاچيرسان دئييلم ديوانه

دوزدی عهديم بونی گل سيل جماعتده دئييم

گل گيلن قوی سنه اؤز عشقيمی ابراز ائله ييم

آيريليق شرحينی من كلبه وصلتده دئييم

شهر هرلحظه شلوغدير هاواسی دودآلود

گل گيلن بير بيزه سن تا كی نه وار كتده دئييم

ياپيشاق ال اله بير سئير ائليگ داغی- داشی

گل سنه سوزلريمی قلب طبيعتده دئييم

برق عشقين منی قورخوم بودی دوتسون بيردن

وورا بيلمم اليمی من سنه حيرتده دئييم

قورخورام وصلينه چاتماقلا گئدم تئز حالدان

عشقيمين رازينی قؤی اول فرصتده دئييم

يولوم عبدالصمدا كاش خراباته دوشه

يئری وار بو غزلی مجلس عشرتده دئييم

(آهسته آهسته)

گليم قوی زولفووه شانه ووروم آهسته آهسته

يووم عطر و گلابيله هؤروم آهسته آهسته

قاليم يانيندا قول تك ائيله ييم خدمت سنه دائم

نه امر ائتسؤن سنين چون من گوروم آهسته آهسته

اولاندا دونيادان يورغون اولوم بير قول بويون سنله

او غنچه لبلرين هردن سؤروم آهسته آهسته

بو يورغون باشيمی منده ائديم سينه نده بير راحت

سؤرادان قوللوغوندا من دوروم آهسته آهسته

نولار آل بير منی تحويل غم اولسون شادليقا تبديل

قؤوم اول لشگر آهی يؤروم آهسته آهسته

فراقدان اؤلدوم ای دلبر رضا وئر وصلته آخر

بساط عيشی شوقيله قوروم آهسته آهسته

منه مستانه باخ جانا كی اول داغ نگاهينلا

تنور عشقيمی قؤی يانديريم آهسته آهسته

كئچيب عبدالصمد وقتيم گركدير خط پايانه

عؤمور كاروانينی منده سوروم آهسته آهسته

(درس آليب)

زاهدا كونلوم منيم ديوانه لردن درس آليب

وامق و مجنون كيمی مستانه لردن درس آليب

بيزارام من مدرسه مسجد تكايادن بوتون

عارفان اهل دل ميخانه لردن درس آليب

پهن ائديب سجاده نی محراب گلده دورموسان

آدم و عالم دئيير افسانه لردن درس آليب

گل سنه يار عكسينی جام شرابدا گورسديم

بيلمه ييرسن اهل می آيا نه لردن درس آليب؟!

اهل باده اولمايان نی ناله سين درك ائيلمز

مئی ايچن عاشق يقين غمخانه لردن درس آليب

جانيميزدا اوددی بو باده دئييل بير آيری شئی

جمله حق عاشقلری پروانه لردن درس آليب

چوخ معمانی ائديبدير حل شراب كينه سوز

پيسله ين ميخانه نی بيگانه لردن درس آليب

ائتمز آباد دونياسين هر كيمسه ايستر آخرت

گولمه گر عبدالصمد ويرانه لردن درس آليب

(ديله دوشدی)

اوندا كی گوزوم غنچه دهن سئوگيله دوشدی

بيلديم كی ايشيم عالم آرا موشگيله دوشدی

گورموردوم اونی بير نئچه ايل سانكی اولاردی

گورجك اونی بيردن اورگه ولوله دوشدی

گاهدان اونی من درسه گئدن لحظه گوررديم

بيلمم آراميزدا نه سبب فاصله دوشدی؟

عهد ائتميشيديم يازدا دوتام جشن وصالی

ياز كئچدی يای اؤتدی خزان اولدی چيله دوشدی

ائتدی منی ديوانه اؤزی بيلمدی اما

آدسيز آديم او حدده كی ديلدن ديله دوشدی

عبدالصمدا گونلری بير- بير ساييرام من

بير گون او گولون بلكه وصالی اله دوشدی

(قوجاتدی بيزی)

كونول نه چاره قيلاق انتظار قوجاتدی بيزی

فغان وآه دل بيقرار قوجاتدی بيزی

اوميد وصليله گلديگ بو عالم عشقه

ولی حئيف كی جفای نگار قوجاتدی بيزی

هاچاناجت داخی بيز ائيليگ بو دونيادا فكر؟

دريغ و درد غم روزگار قوجاتدی بيزی

گول و بهاره چوخ اومّيد بسله ميشديگ بيز

آخير خزانه دؤنن نوبهار قوجاتدی بيزی

نچون كی بيزلره اولدی حرام خوش گونلر

صدای گردش ليل و نهار قوجاتدی بيزی

هوسله سئير ائليرديگ باغی- گوليستانی

قانيله الوان اولان لاله زار قوجاتدی بيزی

يؤخيدی درديميزعبدالصمد بو عالمده

نه چاره حادثه ناگوار قوجاتدی بيزی

(عاشقانه خياللار)

سنه گوزل ياراشارای گوزل عروس ليباسی

علی الخصوص گزه سن لاله و چمن آراسی

هوسله سيره چيخاق ياتماميش گوزی گونشين

بوي‍‍ژه حاكم اولا كند ايچينده ياز هاواسی

گله نوايه چمنده هزار خوش آوا

بيزی حالا گتيره بولبولون گوزل صاداسی

باتاندا گون قاييداق منزيله ائدگ خلوت

مغنّی ميزده چالا بير يانوق كرم هاواسی

يوزون محبت اوزيلن اؤپم تؤر اوستيندن

ايكی برابر اولار من بيلن بونون صافاسی

وصال آخشامينين قدرينی بيلگ باهم

كی هئچ كيميله دئييل ساز بو دونيانين آراسی

بوگون صاباح نه گركدير نه بلليدير گله جك؟

اينانما قورتارا بير گون زمانه نين جافاسی

بوتون جاوانلارا عبدالصمد بو آرزوم وار

حياتدا شامل اولا اونلارا يارين وافاسی

(شاد اولسون)

آرزوم بودیر عالمده بوتون خلق شاد اولسون

دنياده هامی غصه و غمدن آزاد اولسون

شن بزمينه گئتسين قوجالاردا هوسيله

عزلتده قالان پير كهنسال ياد اولسون

دنيا قوتارير ذوق و صفادن چوخی محروم

يا رب هاچاناجت ايشيميز آه و داد اولسون؟

بيز ايسته ميريگ جنگی اگر صلح اولا ممكن

دوشمان نه قدرده ولو اينكه عناد اولسون

غربتده ده قالسان نئچه ايل مثل وطندير

خوشليق اولا فرقی ندی هانسی بلاد اولسون؟

گمنام ياشير چوخلاری من تك ائل ايچينده

نولارمی مجالسده اولارداندا آد اولسون؟

تقوادی عزيز ائيلين انسانی جهاندا

رعيت يادا شاه عاليم و يا بيسواد اولسون

عبدالصمدا سنده قلمله جهاد ائيله

قويما بو قيزيل تپراقی كان فساد اولسون

(كيمدير ياريم؟)

عاشقم اما هراسيم وار دئيم كيمدير ياريم

بسكه اولموش دهريده ديوانه لر تك رفتاريم

چوخلی عاشق گورميشم معروف ائديب اؤز سئوگيلين

اؤلدورللر اما گر من سويله سم كيمدير ياريم

چوخ تلاش ائتديم اولام من عادی انسانلار كيمی

عشق اما قويمادی فاش اولدی آخر اسراريم

ای دريغا گون به گون درد و غميم آرتير منيم

بار الها رحم ائله اولموش پريشان افكاريم

ايندی من اؤز آديما عاشق دئسم بير جرميدير

چونكه هئچ گول ايستمير اولسون منيم ناز ديلداريم

نه ائويم وار نه چولوم سرگردانام بير عمريدير

نه ايشيم وار نه گوجوم نه دولتيم وار نه واريم

بو جهاندا امكانی يوخدير گورم اول دلبری

بلكه ده اونلا منيم عقبايه قالدی ديداريم

عشقيدن چون آلميشام الهام يازاندا هرغزل

تا نه قدری دونيا واردير ماندگاردير اشعاريم

(منيله)

(منيله)

ای كونول واردی دمادم شب ظلمان منيله

اوينادی گور نه اويون زولف پريشان منيله

وصالين حسرتی آخر منی ديلدن سالدی

وای اولا حشره كيمين قالسا بو هجران منيله

گوليشيمدنده كدر ايسی گلير هرلحظه

گوئيا عهد ائله ييب ناله وافغان منيله

سئوديگی دلبرينه چاتدی بوتون عاشق حيف!

هله گلمير يولا بو سئوگيلی جانان منيله

قارادير بختيم ازلدن يوخ اليمدن دوتانيم

فانی دنياده چيخيب چوخلاری دوشمان منيله

گور نه اندازه بو عالم آرا بدبختم من

قالمايير دنيادا نه كفر نه ايمان منيله

مبحث صوفی و زاهد هله گئتسين كانارا

بو جهاندا دوريشيب اهل مسلمان منيله

نيه آزادليقيما من تلسيم دام ايچره؟

واردی قاچسام هايانا ظلمت زندان منيله

درديمه داغدا طبيعت وئريب عبدالصمدا

غم ديليله دانيشير كوه و بيابان منيله

(جانيمدان)

دويمارام سن كيمی ياردان دويام ار جانيمدان

آيريام حيف گولوم سن كيمی جانانيمدان

نولا ردّائيله داها آيريليقين پرده سينی

باشا دوش گل حاليمی ديده گريانيمدان

دؤيدوروبسان ياشاييشدان منی ظلميله دريغ

چكمه ييرسن هله ال قلب پريشانيمدان

گر ائشيدسن اورگيمدن اوجالان فريادی

چاغيرير داده سنی گوشه زندانيمدان

يوخ نيازيم منی بير كيمسه نصيحت ائليه

شیخ صنعان کیمی من کئچمیشم ايمانيمدان

جنتی ايستميرم غمكده كافيدی منه

بير قارا خالدی چيخارديب منی رضوانيمدان

منی قورخوتما جهنم آلاويندن زاهد!

چونكی دوزخ اؤد آلير سينه سوزانيمدان

گر منی عشق يولوندا چكلر داره نه غم؟

منصورام رمز حقايق توكولر قانيمدان

تار و پودوم داغيليب تار كيمی عبدالصمدم

نغمه لر جانه گلير نا له و افغانيمدان

(محك)

(محك)

زندگی بيلمز ندير بحرانه هر كيم دوشمه ييب

كيم چتين ليگ چكمه ييب طوفانه هركيم دوشمه ييب

شنليگين رمزين تاپا بيلمز صفا بيلمز ندير

سوز وآه وناله وافغانه هر كيم دوشمه ييب

قيش گورن بولبول بهارين قدرينی ياخچی بيلر

بيلمز آزادليق ندير زندانه هركيم دوشمه ييب

بايقوشون توتقون سسی ياده سالاندا غملری

آه چكمز كلبه ويرانه هركيم دوشمه ييب

شمع اوديندايانماقی پروانه نين آسان گلير

ذره- ذره آتش سوزانه هركيم دوشمه ييب

عاقبت اولماليدير پئشمان حياتيندان بلی!

بو بلا ميدانينا مستانه هركيم دوشمه ييب

هئچ زمان عبدالصمد! اؤز قدرتين درك ائيلمز

بير يليله رزم ايچون ميدانه هركيم دوشمه ييب

(افغانيم وار)

(افغانيم وار)

خياليم سنسن آ گول تا نه قدر جانيم وار

سنه ای نازلی نگار عشق فراوانيم وار

گرگين احوالدا يامان گونده اينان كی گوزليم

افتخاريم بودی كی سن كيمی جانانيم وار

حيف كی وئرمه ييسن وعده وصلت منيچون

حسرتيندن صنما سينه سوزانيم وار

سنه بئل باغلايانی گوندوزوم آخشام كيميدير

وای كی سنسيز نه سحرسيز شب ظلمانيم وار

بيلمه يير رازيمی هئچ كيم نه ساياق مجنونم؟

ای پریچهره منيم عشقيدن افغانيم وار

غميمين شرحينی مين دفتر و طومار دوتماز

بير سطير سؤزدی فقط غصه هجرانيم وار

عشق درياسينا ايكاش آياق قويمايديم

ايندی هرلحظه منيم قورخولی طوفانيم وار

بير عومور گوزله ميشم من سنی عبدالصمدم

يئنه ده گوزله يه جم وصلينه ايمانيم وار

(حاله گليم)

(حاله گليم)

بيليرم يئتميه جك گر سنه بير لحظه اليم

لااقل زولفينی توك گردنينه حاله گليم

سن گولنده ائله بيل دنيا منه جنت اولور

عفو ائله چوخ آشاقا رتبه ده دی بو مثليم

بو نه صورتدی كی آئينه ائدير شرم اوندان؟

فاش ائدرديم بو رازی گر صاف اوليدی عمليم

خاطريمدن او گولر يوز اونا خاطر چيخمير

كی تاپيب معنی سنيله ابديم هم ازليم

زولفينين سرّی فريبدير بونی شكسيز بيليرم

آللاديبدير چوخينی ای بت مست و دغليم!

نه دئييم من سنه كی باشدان اياقه نازسان

منی حالدان آپاريب قامت سروين گوزليم

زولفينين خير و شرين ايستمديم بير لب وئر

چوخلی مدتدی كی صبحانيه يوخدير عسليم

قوجاليب ياشی داها طبعيمين عبدالصمدم

سنه خاطر داريخير مرغ قفس تك غزليم

(ضرر اولدی)

(ضرر اولدی)

وصلت گئجه سی گور نه شتابلان سحر اولدی

بير حاليده كی روح و روان بی خبر اولدی

عاشقليگيمين جرمينه من زار و فقيرم

عشقين بازاريندا منه چوخلی ضرر اولدی

وصلين مزه سين دنيادا من دادماديم آخر

پروانه كيمی عمر جوانيم هدر اولدی

چرخ فلكين قارقيشی توتدی منی گويا

باشدان اياقا دونيا منه غم- كدر اولدی

آرزی ديارين تاپماقا دوشدی يولا كونلوم

مجنون كيمی چوللرده قاليب دربدر اولدی

خوش گون گوره دونياده اينانما هر او كس كی

عاشق قويوب اؤز آدينی مرد سفر اولدی

افسوس كی افسانه كيمی قصه عشقيم

نقل اولدی بوتون يئرده ولی بی اثر اولدی

عبدالصمدا يولدی جهان بيزده مسافر

نوبتله بو دنيايه هامی رهگذر اولدی

بير آخشام

(بير آخشام )

قوياسان بوينوما يار! منت اگر بير آخشام

چاتارام كامه اولا فرصت اگر بير آخشام

اؤلمرم حشره كيمين فانی جهاندا سنيله

ائيله سم صبحه كيمين خلوت اگر بير آخشام

قسم آللاهه كی ياديمدان اؤلونجه چيخماز

سندن آلسام گوزليم لذت اگر بير آخشام

نه اولار بير گونی حال سفره سينی باهم آچاق

نه اولار ممكن اولا وصلت اگر بير آخشام؟

خاطره دفترينی عشقوويله دولدوررام

گوزلرين اولسا منه قسمت اگر بير آخشام

منتظر قال بو ياخينلاردا سيزه گلمه ليم

پؤزغون عشقيم ائلسه غيرت اگر بير آخشام

گومان ائتمه كی بو قلبيمده كی سؤزلر قوتارا

صبحه تك سنله ائدم صحبت اگر بير آخشام

ای گوزل صبحون آچيلماز مگر عبدالصمدی

كويينه ائيليه سن دعوت اگر بير آخشام؟

,عبدالصمد حمزه خانين « واردان سوراسين » شعري

(واردان سوراسين)

نيليرم دنيادا اول چشم خماردان سوراسين؟

ايستمز عاشق اولان نازلی نگاردان سوراسين

سيزی آلله جاماعات سيز منه ياردان دانيشون

نه ائدير بولبول آخير باغ و باهاردان سوراسين؟

عشقيدن سونرا كونول هر نمنه يوخ كيميدير

باری جاهلدير او كی آختارا واردان سوراسين

منم اول عاشق آزاده كی مردانه صفت

آتميشام هر نه يی بو دهريده ياردان سوراسين

دنيايا گلسم اگر مين دفه دن من ينه ده

انتخاب ائتمرم اول لاله عذاردان سوراسين

قالان انسانه بو دنياده صفا و حالدير

من فسانه بيليرم بوس و كناردان سوراسين

آرزومدير هامی عبدالصمدا خوش ياشاسين

سئويرم ملتيمی مردم آزاردان سوراسين

عبدالصمد « اولارسان مي؟ » شعري

(اولارسان می؟)

اگر اولسام سنه عاشق منه دلدار اولارسان می؟

اگر كی غمكشين اولسام منه غمخوار اولارسان می؟

اگر عشقينده مجنون تك دوشم كوه وبيابانه

منيم عشقيمده سن ليلی كيمی آغلار اولارسان می؟

اگر ای شوخ درديند ن دوشم الدن اياقدان من

باشيم اوسته پرستاردل بيمار اولارسان می؟

اگر جرأت تاپيب بير نامه يازسام يؤللاسام سنچون

منيم اصراريميله مايل ديدار اولارسان می؟

اگر اولسا سنه ثابت دوز عشقيم ايلقاريم سئوگيم

عناديندان چكيب ال دشمن اغيار اولارسان می؟

ياشيرعبدالصمد هر آن اوميد وصليله ای گول

اؤنا بير گون بو دنياده گوزل بير يار اولارسان می؟

عبدالصمد « به هاچان » شعري

(به هاچان؟)

چاتاجام من سنه ای سئوگيلی جانان به هاچان؟

باخاجام گول يوزينه ای گول خندان به هاچان؟

تنگه گلديم داها بو گونلری سايماقدان من

منه همدم اولاجاقسان سنه قربان به هاچان؟

كام دل بس وئره جكسن منه آيا نه زمان؟

ائده جكسن منی اؤز كويينه مهمان به هاچان؟

بير خبر يوخدی هله پيك وصالدان افسوس

عيش و وصله اولاجاق دهريده امكان به هاچان؟

عمر قورتاردی صد افسوس كی قورتارمادی غم

غملی كونلوم اولاجاق شاد و خرامان به هاچان؟

نه زمان قورتاراجاق آيريليق ايامی داها

تاپاجاق اؤز گولينی بولبول نالان به هاچان؟

سئوديگيم دلبره گئنّن ده باخا بيلمه ييرم

وئره جك چرخ فلك عاشقه ميدان به هاچان؟

نه قدر صبر ائد گ عبدالصمدا آيريليقا؟

دولانار كاميميزا گردش دوران به هاچان؟