آتــــــــــــــــــــالارســــــــــوزی

توركون ديلي تك سئوگيلي ، ايستكلي ديل اولماز
اوزگه ديله قاتسان ، بو اصيل ديل ، اصيل اولماز
اوز شعريني فارسا ، عربه قاتماسا شاعر
شعري اوخويانلار ، ائشيده نلر كسيل اولماز
فارس شعري چوخ سوزلريني بيزدن آپارميش
(صابر) كيمي بير سفره لي شاعر ، پخيل اولماز
توركون مثلي ، فولكلورو دونيادا تك دير
خان يورقاني ، كند ايچره مثل دير ، ميتيل اولماز
آذر قوشونو ، قيصر رومي اسير ائتميش
كسري سوزودور بيربئله تاريخ ناغيل اولماز
پيشميش كيمي ، شعرين ده گرگ داد - دوزو اولسون
كند اهلي بيلرلر كي ، دوشابسيز خشيل اولماز
سوزلرده جواهر كيمي دير ، اصلي بدلدن
تشخيص وئره ن اولسا بو قده ر زير - زيبيل اولماز
شاعر اولا بيلمزسن ، آنان دوغماسا شاعر
ميس سن ، آبالام ، هر ساري كوينك قيزيل اولماز
چوخ قيصا بوي اولسان جن كيمي شيطان
چوخ دا اوزون اولما كي اوزوندا عقيل اولماز
مندن ده نه ظاليم چيخار ، اوغلوم ، نه قصاص چي
بير دفعه بوني قان كي ايپكدن قزيل اولماز
آزاد قوي اوغول عشقي طبيعت ده بگه نسين
داغ - داشا دوغولموش ده لي جئيران حميل اولماز
انسان اودي توتسون بو ذليل خلقين اليندن
آللاهي سئوره سن ، بئله انسان ذليل اولماز
چوخ داكي سرابين سويو ، وارياغ - بالي واردير
باش عرشه ده چاتديرسا ، سراب اردبيل اولماز
بير ذره مساوات اولا ، شاعر چوپه دونمز
اربابلاريميزدان دا قارينلار طبيل اولماز
دوز واختدا دولار تاختا - طاباق ادويه ايله
اوندا كي ننه م سانجيلانار زنجفيل اولماز
بو(شهريار) ين طبعي كيمي چيممه لي چشمه
كوثر اولا بيلسه دئميرم ، سلسبيل اولماز